Góðir félagsmenn! Mér þykir orlofshúsamál félagsins umhugsunarefni – sérstaklega í ljósi viðtaka félagsmanna um seinustu helgi en orlofshúsanefnd auglýsti sem kunnugt er tiltektarhelgi í Gullhvammi. Undirrituð mætti á laugardag í tiltektargír en óhætt er að segja að þverfótað hafi verið fyrir félagsmönnum – eiginmaður Halldóru var þar við störf og rétt seinna komu þær Halldóra, Lára og Helga. Virðist sem svo að félagsmönnum þyki sjálfsagt að sjálfboðaliðar í orlofshúsanefnd taki einir ábyrgð á orlofshúsunum okkar, þ.m.t. að sinna viðhaldi og tiltekt. Dæmin hafa sýnt að félagsmenn hringja í orlofshúsanefnd og kvarta yfir drasli í skáp í stað þess einfaldlega að taka til í andsk. skápnum! Ég legg til að við förum að umgangast þessa sameiginlegu eignir okkar sem akkúrat það: sameiginlegar eignir.
Kveðja, Hlín

Helgina 14.-16. maí var vinnuhelgi í Aðalbóli og Gullhvammi. Eldsnemma á föstudagsmorgninum fórum við Lára norður í Aðalból með viðkomu á Akureyri, þar sem keyptar voru tuskur, hreinsiefni og aðrar nauðsynjar. Í Aðalbóli hittum við Tóta og í sameiningu þrifum við bústaðinn hátt og lágt og hentum rusli, þ.á.m. fullt af matvælum sem runnið höfðu út á síðustu öld. Á meðan á þessu stóð var eiginmaðurinn sendur í Gullhvamm með kerru fulla af sandi í sandkassann og möl í tröppurnar, ásamt tuskum, hreinsiefnum og tilheyrandi. Snemma á laugardeginum komu svo þangað Hlín og hennar maður og seinnipartinn mættum við Lára ásamt Helgu. Í Gullhvammi var borið á frönsku gluggana og þeir þvegnir að innan og utan, skápar, skúffur og hillur þrifnar, tekið til í geymslunni, gert við loftnetið uppi á þaki og fleira skemmtilegt. Í þessari tiltekt fylltist heil kerra af rusli, svo ekki var vanþörf á. Vegna votviðris var hvorki hægt að bera á bústaðinn né pallinn en sjálfboðaliðar í það verkefni óskast hér með. Um kvöldið var svo grillað læri og horft á Eurovision. Við hefðum gjarnan viljað gera meira en komumst ekki yfir það vegna tímaskorts og manneklu, því fleiri sem mæta á vinnuhelgi, því meira er hægt að gera. Að lokum hvetjum við félagsmenn til að ganga vel um bústaðina í sumar og óskum ykkur góðra stunda í frábærum bústöðum.
F.h. orlofsnefndar, Halldóra Klara

Fundur var haldinn í trúnaðarráði 10. maí sl. Verkefni fundarins var að skipta verkum á hópinn en ekki er gert ráð fyrir að trúnaðarráð komi aftur saman fyrr en í haust. Þrír vinnuhópar voru myndaðir: lífeyrismál (HM), samanburður við kjör annarra hópa (EY) og rökstuðningur við kröfur um styttri vinnuviku ofl. (SG). Þeim sem ekki komust á fundinn er bent á að velja sér hóp og hafa samband við viðkomandi hópstjóra, hugmyndin er að þegar við hittumst aftur í haust kynni hver hópur sína vinnu. Ég vil nota þetta tækifæri til að þakka fólki fyrir þá fundi sem haldnir hafa verið nú í vor og vona að allir hafi það gott í sumar.
HM

Formaður fór á fund formanna, sk. „president’s meeting“ í Malmö nú um helgina. Fundurinn hófst á föstudag með því að flugsstjórnarmiðstöðin í Malmö var skoðuð eða flugstjórnarmiðstöðvarnar væri réttara að segja því auk flugstjórnarmiðstöðvarinnar sem flugumferðarstjórnin fer nú fram í þá var „nýja flugstjórnarmiðstöðin“ einnig skoðuð, hún stendur tilbúin, aðeins er beðið eftir því að fluggagna- og ratsjárkerfið, Eurocat 2000, verði líka tilbúið. Ég segi „nýja“ því eftir því sem mér er sagt þá eru nokkur ár síðan til stóð að flutt yrði „á næstu mánuðum“. Hvað um það, mætt voru á fundinn allir formenn, það er ánægjulegt að segja frá því að kvenmenn voru í meirihluta en formenn Svía og Dana eru þær Camilla og Pernille, Sami er formaður Finna og Rolf er formaður Norðmanna. Laugardagurinn fór í fundarsetu þar sem rædd voru ýmis mál, ljóst er að öll erum við að stóru leyti að glíma við samskonar málefni. Fyrirhugað NUAC (Nordic upper area control) center í Malmö er Dönum og Svíum talsvert áhyggjuefni og nokkuð var rætt um þá miklu óvissu sem enn ríkir um þá fyrirætlan. Finnar, Norðmenn og Svíar standa allir frammi fyrir fyrirætlunum um fækkun flugstjórnarmiðstöðva og er því nokkurt áhyggjuefni hvernig staðið verður að málum á hverjum stað. Norðmenn telja að illa hafi verið staðið að því þegar flugstjórnarmiðstöðin í Trondheim hafi verið lögð niður og starfssemin flutt til Bodö. Fyrirhugað er að taka ákvörðun nú í haust um frekari sameiningu en hugmyndin er sú að sameina starfssemina í Stavanger og Royken á öðrum hvorum staðnum. Ljóst er að breyting verður hjá Finnum og Svíum á næstu árum vegna fyrirhugaðs aðskilnaðar þjónustu, stjórnsýslu og eftirlits en enn eru þeir undir hatti flugmálastjórna landa sinna. Af öðrum málum er það að frétta að sumarið er að bresta á í Svíþjóð og fyrir þá sem ekki vissu betur þá get ég frætt ykkur á að fjallahjólabyltingin hefur ekki náð til Malmö, þar eru gömlu DBS hjólin enn í fullri notkun og ekkert útlit fyrir að það breytist á næstunni!
HM