Í kjölfar samningafundar Félags íslenskra flugumferðarstjóra (FÍF) og Isavia hjá ríkissáttasemjara sem lauk fyrr í dag, komust deiluaðilar að þeirri sameiginlegu niðurstöðu að vísa málinu í gerðardóm. Er það gert í ljósi þess að lítið hefur þokast áfram í kjaraviðræðum þar sem sjónarmið FÍF hafa ítrekað verið hunsuð.
Var samninganefnd FÍF því nauðbeygð að velja þessa leið til að tekin verði bindandi ákvörðun um málið svo að tryggja megi áframhaldandi þjónustu flugumferðarstjóra og koma í veg fyrir að orðspor Íslands sem þjónustuaðili fyrir alþjóðlega flugrekendur verði fyrir skaða. FÍF óttast þó að vísun kjaradeilunnar til gerðardóms, og niðurstaða hans, leiði ekki til fullnægjandi leiðréttingar á starfskjörum flugumferðarstjóra. Núverandi aðstæður einkennast af miklu álagi, manneklu, fáliðun og háum starfsaldri innan stéttarinnar, sem hefur neikvæð áhrif á þá mikilvægu þjónustu sem stéttin veitir flugrekendum á hverjum degi.
Niðurstaðan er enn og aftur mikil vonbrigði. Flugumferðarstjórar hafa verið samningslausir frá áramótum sem meðal annars vinnur gegn hagsmunum Íslands sem Isavia hefur verið falið að uppfylla og þeirra fjölmörgu flugrekenda sem fara um íslenska og alþjóðlega flugstjórnarsvæðið.
Viðvarandi fáliðun og mannekla hefur leitt til mikils álags innan stéttarinnar sem hefur haft þau áhrif að Isavia, stærsti vinnustaður flugumferðarstjóra, hefur þurft að óska eftir mikilli yfirvinnu af hálfu flugumferðarstjóra með tilheyrandi kostnaði og óhagræði. Takist Isavia ekki að manna vaktir, verður Ísland af mikilvægum gjaldeyristekjum þar sem beina þarf flugvélum frá íslenska flugstjórnarsvæðinu.
Enn verri er sú ógn sem steðjar að alþjóðlegum samningum þar sem slíkir samningar greiða laun flugumferðarstjóra að langmestu leyti. Laun flugumferðarstjóra koma því að mestum hluta erlendis frá og eru því ekki greidd af íslenska ríkinu. Í þessu samhengi skal einnig hafa í huga að íslensk flugumferðarstjórn er gjaldeyrisskapandi útflutningsatvinnuvegur sem skilar á milli 8 og 9 milljörðum króna í gjaldeyristekjur á ári hverju.
Flugumferðarstjórar hér á landi sinna mikilvægu hlutverki til að tryggja örugga flugumferð til og frá landinu og eru á sama tíma ábyrgir fyrir einu stærsta flugstjórnarsvæði heims. Nauðsynlegt er að tekin séu mið af kröfum félagsmanna FÍF til að bæta starfskjör þeirra, stuðla að nauðsynlegri nýliðun innan stéttarinnar og á sama tíma draga úr álagi á starfsfólk til að geta veitt samfellda og faglega þjónustu alla daga ársins.